#якбыло: Дêнь Русина 2018

21. апріля 2018

21 апріля у Мукачеві проводило ся традиційноє празнованя Дня Русина, на честь великого будитиля нашого народа, Александра Духновича.

Про Духновича накурто мош пувісти, ош уто воістинну великый чôлôвік, котрым мы маєме ся фурт гордити.
Бо як у Українців є Шевченко, у Рôсіян – Пушкін, так и у нас є свўй величайшый поет, благодаря котрôму наш народ жиє, жив и буде жити дале.

Госпôдь порадовав нас файнôв погôдôв, туму празнованя проводило ся весело. Коло драматичного театру была дуже файна атмосфера.
Почали ся сходити поважні люди и начинати мижи собôв усякі бисіды, фіґлі.
Я быв радый відіти многых честованых поетўв, музикантўв и громадськых діятилўв из котрыми я приятно поговорив. Ищи май великого проміння у атмосферу дали наші русины из Словакії, кутрі почали играти прикрасні співанкы. Играли співанкы, співали даже танцьовали. Ни забывав повеселити чилядь фіґлями и Иван Крафчик, котрый ищи извесный пўд псевдонімом Ґобі.

Традиційно ся выдбыло покладання вінка до памнятника будитиля. Ишлисме весело, пўд музиков. Діти из «Бабчинôї співаночкы» Ольгы Кирилівнôй Прокоп несли флаг державы и наш русинськый.
Гості из Словакії несли словацькый.

До мене и до головы Свалявського Общества Подкарпатськых Русинов Ивана Юровича Кушніра быв ся обратив турист из Польщі и почав звідати, ош що туй типир ся діє, куму ото памнятник.
Иван Юрович розказав усьо на що поляк пувів, ош у них мало тко знає за Духновича и в общôму за русинўв. Тôму треба бы нам ся старати, убы нас знаши вшиткі по всьôму світі.

Пўсля покладання вўнкўв, была зроблена фотографія учасникўв днешного празника, пўсля того усі сме пўшли у театр, де ся начала урочиста часть.

Єден из ведучых быв Мельник, котрый из своив робôтôв справляв ся на усі 100 процинтўв. Дуже красно выступили русины из Словакії. Файно співали, а плюс до того прикрасна актьорська игра. Розказовали стихы и співали діти из «Бабчиної співаночкы». Выступали гурт «Фатьове», Мирослава Копиниць, Сергій Савчук, Иван Ґобі Крафчик. Мав им чисть выступити тай розказати свої стихы на патріотичиську тему и пувісти пару слўв за єдность котра має быти у нашого народа.

Хôть ни было дуже много людий айбо итак усьо было прикрасно. Ни мош ни спомнити, ош Юрій Шипович провів для своих учиникўв Плоскўвськôй школы екскурсію, де діти много узнали за істôрію рўдного краю, а также из своим учитильом были и на празничному концирті.

А за організацію днешного сята треба подяковати голові Крайового Общества Подкарпатськых Русинўв Микôлі Бобинцю. Дякуєме за Ваші старання тай прикрасный празник!

Михаїл Чикивдя

прочитати щê:
#якбыло: Дêнь Русина 2019
#якбыло: Чехословацька републіка й Пôдкарпатська Русь – четверть стôлїтя вєдно