Дóкі Русины будут сепаратистами у очах Українцю?

15. апріля 2018

Слава Ісусу Христу!

Векшина обывателӱв Україны асоціювут термін "Пôдкарпатськый Русин" з сепаратистом з Закарпаття, кóтрый пӱдпóрує Рóсію вадь Мадярщину и шелияко ся снажить дестабілізôвати ситуацію у реґіоні. Давайте будеме чêсні - на то суть прічіны. Кідь попозерати стôрӱнкы русинськых активістӱв у соціалнӱй сїтї «Facebook» - часто мож найти публікації антиукраїнські, а щê май часто - публікації проруські. Мож дóвго спорити на тему урядӱв на Українї, выслїдок буде усе єден - кідь ти выгодна нишня власть, ты будеш за нêї, кідь нїт - будеш протів. Айбо дóкі Русины будут сепаратистами? Коли Українець повість си - "Сись лêґінь Русин и то нормално"?

Дóкі Русины будуть пережывати за пôлітичну ситуацію у світї бӱльше, ги за властну културу и традиції, дóті и будеме мы "сепаратисты". Місто того, ôбы сокотити и розвивати културу мы бӱльше пережываєме, "ко там буде правити у Єврóпі, ци Росія, ци ЄС»... То є важно, без дебат, айбо нарӱд, котрый на окраю вымераня має рішати у май навперед свóї локальні проблемы. Я дуже радый, ож маєме веля талантливых люди, як старых так й молодых, кôтрі суть праві патріоты нашôї рӱднôї културы. Єден їх вїрш зробить про русинську културу й чêлядь бӱльше ги сто антиукраїнськых публікацій на Facebook в рокаши.

Кóй місто писаня постӱв про пôлітику мы пуйдеме й орґанізуєме у сельскӱй шкóлї вадь книговницї добровóлный кружок читаня русинськôї літературы про дітвакӱв, тôды мы зачнеме ся міняти у очах чêляди, тôди мы щê будеме мати шанс усокотити нашу бêсіду и нарӱд.

Я прóшу каждого, тко рахує ся патріотом, покласти си хóть єдну ціль, котра годна помочи русинськӱй сполочности й до кӱнця сього рóку ї выконати. Ци то буде выдача книгы, ци то буде простый куртый віршик на стїнї фейсбука - єдно, главноє шóсь зачати чинити.

Слава навікы Бóгу!

Слава Русинам, отцам и сынам!