Дниська вшыткі люди дуже ся яли переживати за еколоґіу тай природу, што є гибы добрōв тенденцийōв. Каждый божый динь видеме в новинках, ож люди палят листя, тай ож чого вто є злое дїло. Табулкы, дослідженя, высновкы експертӯв… Айбо на люди в селах ото не фунґуе, як палили — так палят. Як исю традицию сперти — мусите си думати саминькі. А я вам доты розкажу як ся исе зародило.

Курта бисіда

У родині ми казали, ож май давно у нас у селови листя нитко не палив. Листя ся файнинько загрібало у кучу та митало ся на гнӯй, бо з того было дуже файное добриво про зимлю.

Тадь а коли зачали палити?

Щи за Чехословакиі, ги розказōвали старші, листя ся згрібало на гнӯй; пук из киндириці ся закопував ид бульом на другый рӯк, обы перегнивало.

А уже пӯсля войны люди ся имили садити бӯльше киндириці ги до того. А што чинити з тым быльом? Худоба го істи не хōтіла, бо дуже грубое тай твердое. Та люди зачали раз измітовати на кучу тото быля та палити. А пак дале си рішили люди економити силы та не дїлити вшытко, што ся убставало на городї, ай загрібати у єдну кучу ид киндириці та палити всьо нараз. Ид тому ся добавило і листя из двӯрця, а пак даже мусор, котрого чим дале тым ставало май много (даже такый, котрый бы палити ни слобӯдно!).

А уже у наші дны, кой люди у селови чим дале тым май мало садят дашто на гōрōді, гнӯй уже стало ни треба, а листя фурт як было так є.

Та самое простое рїшеня про люди было тай є вто листя спалити. Айбо тко уповів, ож самое просто рїшеня є самым здоровым авадь правильным?

Сокотити традициі є дōбрї, лишек кōй вты традициі вас не убивавут. Думайте мало головов, сохташ ся дасть пōміняти.

Блоґ автора