Як давно жинили ся, авать выддавали ся я уже писав туй. Дуже интересна пôлучили ся інформація про читатчӯв. Многым типирь чунно, ош як могла ужити ся родина, де чôлôвік из жōнōв ни дôлюбльовали єден другого. Бо у типирішнїій час, кить щōсь та нарас розвод. А ци быв розвод давно? Ци могли розвисти ся молодята, кить фурт ся вадили и ни могли ся зжити?

Ôтвіт, як бы ôто ни было чунно, дав ми мадярськый архів. Так ся каже, ош у Подкарпатськӯй Териттōрії Мадярського Кôрулівства, у 1941 рōці, было проведено ряд переписӯв, єден из якых указує, кӯлько пар было розписано, кӯлько было вдōвӯв/вдӯвцїв, кӯлько было розведеных. Сякый перепис быв проведеный у многых населеных пунктах, мижи якых Кирецькы и Березникы.Ôфіціальна назва перепису «Людность по роках 15 и старше за сімийным статусом».

Пувім на перед, ош станом на 1941 рӯк у Березниках быв ôфіціально єден розвод, а у Кирицьках ни было и єдного. Туй и є ôтвіт. И мош пувісти, ош айно, даже у тых родинах де была суєта розводӯв ни было. Ни розводили ся, бо давно чистовали таїнство вінчанія, ôто было ни просто так, ги типирь, пӯти до церкви.

Убы очерк ни быв дуже куртый, то подам Вам інформацію-ризультат тых переписӯв у Березниках и Кирицьках. Думаву, буде про читача исе интересно.

  1. ЛЮДНОСТЬ ПО РОКАХ 15 И СТАРШЕ ЗА СІМиЙНЫМ СТАТУСОМ
    BEREZNIK
    1. ЛЮДИ
    Вшитко - 686
    Нежинаті – 214
    Жинаті – 439
    Вдувці – 32
    Розвидині - 1
    2. ЖОНЫ
    Вшитко – 773
    Нивыддані – 190
    Выддані - 480
    Вдовы - 102
    Розвидині – 1

Ризультаты видите. Єдна пара офіціально розведена.

  1. ЛЮДНОСТЬ ПО РОКАХ 15 И СТАРШЕ ЗА СІМиЙНЫМ СТАТУСОМ
    KERECKE
    1. ЛЮДИ
    Вшитко - 1030
    Нежинаті – 318
    Жинаті – 677
    Вдувці – 35
    Розвидині - 0
    2. ЖОНЫ
    Вшитко – 1089
    Нивыддані – 217
    Выддані - 750
    Вдовы - 122
    Розвидині – 0

У Кирицьках розведеных ни было. Вшиткый ризультат можете прочитати. И пувім ищи рас, ош таїнство вінчанія играло вилику рōль у русинськых родинах, жаль, ош типирь люди до сього так паскунно ся ставлят.