Зима – ôто ни лише сяткы, и файна природа дōвкола нас. У давнину зима нисла и проблему, бо холода были май виликі и треба было ся гріти. Тôму, коли жоны занимали ся кōнōплями и ткали, а люди тым часом фурт нарабляви из дрывами, убы было типло у хыжи.

Як правило, у малинькых хыжках быв лиш єден виликый шпор, на якōму варили істи и єден чôлôвік мӯг на ньому спōкӯйно спати. Муровали їх тоды из рōзумом, убы мош ся было удобно пōльзовати ним. И так вӯн давав типло цілӯй родині. Айбо ни лише родині…

Постилі спиціально робили из виликыми лабами, убы пӯд ними были ягнята и козята. И исе чиста правда! У хыжи были ґазда из ґаздыньов, їх діти, могла быти и їх старшина и вшитка мала худоба.

Ягнята, козята, кить было и тиля, усьо было у хыжи, бо у стайни бы ім было дуже студино. Жоны що жинут ся за євро мōдōв, лиш си исе приставлявут, та падут у оморок. Айбо робити было ніщо, та и люди, и худобина были у єднӯй хыжи. У стайни была май груба худоба, ги коровы, вӯці, свині, бо могли май выдержати холод. И сяк было до прихода яри, прихода типлоты.

Розказала ми прабаба была истōрію, ош як мати гойкала дôнці, убы ôта скоро захарила пӯд ягнатями тай тилятьом, бо пӯп ходит «Во Ийордана» сятити хыжі та зараз поверне до них.

Ищи плюс до куртого очерка, обращик из книжкы професора Маґочій «Народ Нивыдкы», убы сте мали уяву, як ôто было.