rueпортал словник ґазета ґраматика

Епідемія корелы у Сваляві 1913 рōку

Епідемія корелы у Сваляві 1913 рōку

Перед зачатком Великōй мировōй войны, у Сваляві и у ближайшых населенных пунктах, стала ся вилика епідимія корелы. Прийшла ōта проблема в подкарпатськый город из Галичины. До слова, доста пōвно проблем, як давно приходило, так и типирь приходит, в Подкарпаття, именно из-за перевала. Исе вшиткым на замітку.

Подкарпатя было выдсталым риґіоном, де пошти ни было рōзвōю мидицины, тōму ніщо ся чудовати, ош нашым крайом фурт проходили епідимії, и они мали дуже страшні последсвія. Я уже писав, про хвороты Дōвжанського ōкругу Мараморошського кōмітату. Тоды были пōвмирали дисяткы беризнян и керечан, а по вшиткых селах ōкругу число жертв доходило повер сотнї. Про Свалявську епідимію активно писали у государственных газетах. Май бӯльше статтїв было написано у мадярськӯй газиті «Szamos» за септембер 1913 рōку. Мусай признати, ош исе дуже интерисні статі, де хōть накурто, айбо дуже інформативно усьо ся подавало.

Подаву текст, убы усїх кого интересує, могли тоже прочитати и мати интересну информацію.

БЕРЕГОВО, септембер 2
У Бережськōму кōмітаті корела ширит ся, розводит ся дождливо. Было ōфіціально пӯдтверджено, ош епідимія прийшла из Галичины у высокогōря Мадярщины. Є уже пару пӯдōзрітїльных случаїв и пару смертий недалеко выд Свалявы. У случаї Свалявы, бактерологӯчноє іследовання установило, ош ōто была азіатська корела.

ōфіс управліня Провінціального ōкруга Берег сообщив у ридакцію «Szamos» исе:
– корела была привезена из Галичины. Вода у ріці Латориця была пōвностю заражена бактиріями корелы. На жилізнодорōжнӯй лінії Мукачево-Стрый зачали ся етапы епідемічных пиривірок. У двох сусїднїх селах тай у Вōлӯвци и Скōльому, было пару случаїв зараженя и пять смертий у субōту; у Воловци три смерти, у Скōльому дві.
– Приняли сме всі міры предосторожности, убы предотворити дальшое шириння хвороты. Заміститиль ґубарнатора запрітив пōльзовати ся вōдōв Латориця по вшиткӯй странї. Вдоль рікы є вōєнні, кутрі итак хōснувт вōду Латориці, нипозиравучи на запріт.
Дниськы на місто дії прийшли заміститиль єпископа Іштван Гулачи, инспектор общественнōй охраны здорōвля Блюм и главный медичный рубӯтник ōкруга. ōфіціальных вістий про кӯлькōсть нидавных захворювань рас ни пōступало.

БЕРЕГОВО, септембер 2
За пусліднїми данными, двадцїть пять чōлувік у Сваляві и Вōлӯвци захвуріли корелōв. Нитко из Галичины ни буде допущенный до Свалявы и до Нижнїх Вōрут до сфер услуг.

Субота, септембер 2
Віце-канцлер кōмітату Берег позаганяв обявы по вшиткых ōкругах и городах у районі епідимії, убы проинформовати власті про захворюваня корелōв и смертильні случаї у Воловци в Скōльому. Міськый голова Свалявы Каролі Важай, кōй получив ōбяву выдав розпоряджиння жандармам про арешт галичанськых вандрӯвникӯв на теритōрії, де бушує епідимія.

Сякі кутрї статтї про хворōту, про яку активно писали и подавали информацію. Як видите, проблема была сирйозна и власти як лиш могли, старали ся щōсь зробити. З єдного бōку ни правильно м написав, «епідимія у Сваляві, бо она ширила ся на вилику плōщу, айбо з другого бōку, самый пік хвороты зачав ся именно у сьому городі, и властям треба было ставати на радикальні міры щодо галичан.

Далші статї из катеґōрії Істōрія читайте за удкликованьом
Реклама