rueпортал словник ґазета ґраматика

Походы Римлян до околиць Королева

Походы Римлян до околиць Королева

Всокоченый правопис автора

Попала ми ся в рукы малознана широкуй публіці книга «Очерки по истории географических открытий» проф. Магідовича І.П., выдана в Москві (вид. «Просвещение», 1982). У гл.7 «Римляни в Центральнуй Європі, Азії тай Африці» находиме интересноє описованя походув римськых войськ у Верхньоє Потисся.

Імператор Тиберій

Римськый Імператор Тіберіус, жерело: Wikimedia

Завойовав Середньодунайську низовину и приєднав ї до имперії, яко провінцію Паннонія, імператор Тиберий у 9 році н.е. Межі її простяглися до пудножжя Карпат, якраз до королевських околиць. З того часу войовничоє и многочисленноє племня дакув непрестанно нападало на римські зимлі, аж докіть за них не взявся імператор Траян.

Імператор Траян

Римськый Імператор Траян, жерело: Wikimedia

У 101-106 годах н.е. імператор Траян розбив войсько дакійського царя Децебала, завойовав його столицю Сармізегетузу и приєднав територію теперішньої Трансільванії до Римської імперії – яко провінцію Дакію. Легіоны Траяна добралися аж до теперішньої території Королева – міста, знаного типирь, як Малокопанськоє городище. Туй вони захопили и розрушили поселення Сетідава, де товды ґаздовав фракійськый народ — костобокы, котрі входили до гето-дакійської державы. Они ся примудрили несанкціоновано чеканити сріберні римські монеты – сестерції, причому срібло у них было май чистоє, ги іберійськоє (іспанськоє) срібло, из якого и чинилася римська оригінальна валюта. Археологы знайшли туй монеты Септимія Севера та Люція Вера. Коло самого Королева, до слова, найшли сестерції імператора Коммода, айбо ото вже майпузніший період.

Експедиція Траяна у Карпаты исповнила ся дуже успішно – привюз, яко трофеї, до Рима величезноє богатство – 20 тонн золота і 40 тонн срібла, до того ж захопив родовища жіліза, міді, соли.

Імператор Марк Аврелій

Римськый Марк Аврелій, жерело: Wikimedia

У 174-175 роках імператор Марк Аврелій у долині Тисы громив сарматськоє племня язигув и просунув ся, переслідуючи їх, до міста, де Тиса уходит из гор на долину, около 48⁰ сіверної широты (координаты теперішнього Королева 48⁰ 09ʹ сів.ш., 23⁰ 08ʹ сх.д. точно на выході Тисы згор!). Туй ун розбив конноє войсько якогось племені бастарнув, очольованоє двома вождями. За сим были проведені ще дві операції против сарматув, видимо, десь недалеко.

З позиції історико-географічної Марк Аврелій завершив удкрытя Середньодунайської низовины и вшиткої течії Тисы. Римляни доконечно ознакомилися з 700км удрізком дугы горної системы Карпат, котра стала сіверно-віходным готаром імперії у час її майвысшого розцвіта.

Далші статї из катеґōрії Істōрія читайте за удкликованьом
Реклама