rueпортал словник ґазета ґраматика

Якōв была русинська хыжа у давнину?

Якōв была русинська хыжа у давнину?

Хыжа а ōбыстя все розкаже пōвно за живот ґазды. Из описӯв старых хыж простых Руснакӯв годни сьме дōбрї пōрōзуміти як жыли и яку журу мали наші люде у давнину.

Русинська хыжа у Березниках

Хыжкы были єднопōвирьхōві из соломлянōв стріхōв и бїлыми стїнами. Стїны хыжі мастили глинōв и бїлили. Крышу робили из соломы, дале появили ся хыжі из шинглами. Кругом быв сад и город.

Ґаздӯвськоє опшаря было убгорожено. Заходило ся зōдвōру у сіны, де из єдного бōку была єжна велика комната, а з другого кліть. У кліти стояли ґелеткы из сыром и молоком, а солонина висїла на бантах.

Коли у хыжи клали ōгинь, дым ишōв идгōрі и будив солонину, кōтру лїто искладовали у бōчкы. Тогды у хыжи быв подошōв.

Векшынōв у углови хыжи стояла велика пец на у якӯй ґаздынї пекли хлїб, їсти варили на шпōрї. Звирьхы на пеци спали люде. Пӯд вызором стояла велика лада. На ньӯй были дві покрышкы де чидяль хранила цуря, звирьхы на ладї ся сидїло.

Из другого бōку, коло вызора, стояла шырока лавиця. Коло лавицї и коло лады стояв великый стӯл из великōв тяжкōв крышкōв. Крышка удперала ся и туда клали хлїб, молоко, роплянку, блюдята и диривляні ложкы.

Пӯд стїнōв стояла пōстїль. У постили ни было матрацӯв, місто них было сїно. Вирьх сїна стилив ся вōвняный покрōвиць, а звирьхы бїла ткана верета. Пōстіль была высока и пӯд ньӯй были ягнята. Кидь ся ягнята покотили кōй были морозы, ґазды несли їх до хыж у тепло.

На стїнах векшынōв висїли Бōжі образы и глиняні тарілкы. Были и спеціалні вырізы из дерева куда вішали ложкы.

Коло двири, у закутї, стояла лавичка. На ньӯй стояли відра з вōдōв и бляшка. Пӯд нив были банякы.

Серед хыжі на ґеренді висїла лампа.

Кōй жона хōтїла харити у хыжи – замітала березовым віником, а раз у два тыжднї каяла подошōв.

Люди зимōв кувпотили худōбу и у ручну, пилōв, різали дрыва. Жоны ткали полотно, шыли сорочкы и другоє цуря.

Далші статї из катеґōрії Істōрія читайте за удкликованьом
Реклама