іҐазета
Інтернет новинка Пудкарпатськых Русинув
Руснацькый сохташ – Михайля
21. новембра 2020

Руснацькый сохташ – Михайля

Матеріал Юрія Шиповича за сохташ Карпаторусинӯв на Михайля. Другі публікації на тему сохташа годни сьте прочитати за ōдкликованьом – Сохташ

Правопис автора всокоченый

Архангел Михаил є архистратигом - главнокомандовачом небесного войска. За церковныма канонами, вун возглавляє вшиткы девять чынув ангелув и є головным вояком у битві добра й зла. Рахуєт ся, же архистратиг Михаил побідив сатану и вер ним з небес. З мечом у руках стойить вун пиля ворут рая.

Именно архистратиг Михаил на Страшному суді затрубить на мертвых и буде молити Господа за їх прощеня.

У сесь день треба пуйти у церьков и ся помолити перед образом архистратига Михаила, просячи го помочи од лукавого и темных сил.

Важным сохташом сята Собору архистратига Михаила є помоч бідным и нужденным. Сесь день – файный трафунок, абы ся помирити з тым, з ким челядник ся позважав. На Михайля принято ходити в гості у села, де церква названа на честь архангела Михаила. Там накривавуть щедрі столы з вшилякых мнясных їств, бо цілком скоро зачинать ся 40-денный Руздвяный пуст. Тому в Михайлув день треба файно наїсти ся перед постным заказом, бы ся пак не лакомити. До стола кличуть гостюв, бо, за сохташом - фест гостюв на Михайля пророкувуть газдам заможный слідуючый рук.

Ги и в другі сята, на Михайля заказано робити. Такой у сято Собора архистратига Михаила варто бы постарати ся ни з ким не сважати ся и обставати ся в добруй дяці до самого вечора. Такой на Михайля никому не мож одказовати у помочи.

Здавна віровали, што на сято архангела Михаила зима повноцінно вступала в свої права. У сесь день было принято заганяти худобу у стайню на зимувлю, а такой позурно глипати за знаками природы: кедь на Михайля сніжно, то и Великдень буде в снігови; кедь 21 новембра не є морозу – чекай теплу зиму; иній віщує сніжну зиму, а туман – теплу; кедь у сесь день не є вітра й доща – скоро вдарять морозы; кедь на Михайля ясно – значить, скоро прийдуть моцні морозы.

Юрій Шипович
голова «Русин-клуба»