rueпортал словник ґазета ґраматика

Днесь Друга Пречиста

Днесь Друга Пречиста

21 септембра восточні християне сяткувуть Руздво Пресвятої Богородиці, якоє у карпаторусинув принято называти Другов Сятов Марьов вадь Другов Пречистов. Сесь день, безувно, є наслідником язычницького сято Рожениць, коли наші предкы дяковали покровителям полюв и врожая.

Исторія рожденя Дівы Марії дуйшла до нас из Церковного Переданя – єдного з жерел християнського віроученя. Божа Мати ся родила у невеликому галілейському вариши Назарет, в сімї постаршых людий Иоакима й Анны. Они были бездітныма, и се раховало ся гріхом.

Раз першосященник у храмі не позволив Иоакиму скласти пожертву, вповівши: «Ты не дав потомства Израйилю». Смутный Иоаким подав ся у пустыню молити ся. Иоакиму й Анні явився Ангел и сповістив, што Господь вчув їхні молитвы: «Ти зачнеш и родиш Дочку, благословенну выше всіх. Через Неї прийде благословеня Божоє на вшиткі земні народы. Через Неї буде дано всім людьом Спасіня. Имня юй буде Марія», – вповів Ангел Анні. Через девять місяцюв Анна родила доньку Марію. Пуздніше они оддало доньку в Єрусалимськый храм, де она служила до повнолітя

Наші предкы до Руздва Пресятої Богородиці старали ся зобрати вшиток урожай, а пасічникы зачинали готовити пчол до зимы – прибирати вуликы. У народі казали: «Прийде Пречиста – буде всягды чисто», «Перша Пречиста жито засівать, друга — дощом поливать»

На Сяту Марю сімейні пары, у котрых не было дітий, особо ся молили про рожденя дьитины и вірили, што чудо ся стане.

Раховало ся, кедь жона вмыє ся до восхода сонця, то краса ї всокотить ся до самої старости. Кедь дівка вмыє ся до восхода сонця, то єї обоязково посватавуть у сьому роци.

Такой, абы змоцнити здоровля, дітий обливали на порозі водов.

Давно быв сохташ на берегах водойм водити хороводы, вчиняти вшилякі веселі игры з выбором пары. У сесь період молодым парам мож было ся цюльовати, не обзеравучи ся на позуры старшины й сусідув. З дня сята Руздва Пресятої Богородиці мож было засилати сватув до дівчат. Фігльовали: «Прийшла Пречиста — принесла старостув нечиста».

У сесь день, кедь помастити рукы чимись чорным вадь ступити на віник и постояти на ньому пару минут, то скоро мож заробити файні гроші.

Яка погода на Другу Пречисту – таков буде и подалша осінь.

Кедь на Другу Сяту Марю тепло - осінь буде тепла й ясна, без рясных дощув. Кедь небо хмуравоє – осіння студінь прийде з дощами.

Кедь марга ся рве на толоку зрана - й зима буде рання.

Жебы быти здоровым, у сесь день спальовали староє шатя й обув.

У день Руздва Пресятої Богородиці мавуть быти чистыма помислы. Не мож пудвышати голос, жадати другому зла вадь думати про когось пудло.

Од Другої Сятої Марі зачинать ся другоє «бабиноє літо», а вже по праздникови челядь зачинала чекати шорового сята – Покровы Пресятої Богородиці: «Прийшла Пречиста — на дереві чисто, а прийде Покрова — на дереві голо».

Далші статї из катеґōрії Даты читайте за удкликованьом
Реклама