rueпортал словник ґазета ґраматика

Кōрōльово желїзничарськоє – істōрія рōзвōю Кōрōльова | часть І.

Кōрōльово желїзничарськоє – істōрія рōзвōю Кōрōльова | часть І.

I. Начаток: За Ференца-Йовшкы (імператора Франца-Йосипа ІІ)

Справдішнїм презентаційним образом теперішнього Королева треба признати аж ніяк не королевський замок тай имак не колоритных циганок, як гадают многі прийшляцькі туристы. Кōрōльово стало унікальным дякуючи желїзниці, яка сформовала його у типирішньому виді робочого селища, вдыхнула у нього інженерно-технічну менталіту, зробила економічным центром ушиткої Затисянщины.

Старт перетвореню типового бідного угочанського села на динамічно розвинутый населений пункт стався у 1868 годі, коли мадярськый уряд створив акціонерну державну залізничну компанію МÁV - Magyar Államvasutak, єдным з пудрозділув котрої стала компанія Мадярська Сіверно-Виходова желїзниця (Magyar Északkeleti Vasút (MÉKV)). Зобравши в ракаш ресурсы приватных інвесторув, дирекція компанії розвернула строительство желізных дорог у карпатському регіоні высокыма темпами. Адміністративно лінію Кōрōльово – Берегово-Батєво запустили у новембрі 1869 года из стандартным європейськым штреком ширинов 1435 мм. Коло Текова меже Кōрōльовом і Севлюшом на Тисі поклали основный и заплавный мосты, а магістральный деревляний муст учинили до літа 1872 года. желїзничный рух начався 16 юнія 1872 года споїньом Сатмарнейметі-Буштьогаза (теперішні Сату-Маре – Буштино), сполучивши Центральну Мадярщину из Мараморошом, а потому через Рахово-Коломыю и з Буковинов. 24 октовбра сього же года запустили рух у смері Кōрōльово –Чоп.

Такым образом, Кōрōльово стало важным желїзничным узлом, де сточилися дві лінії Дебрецен – Буштино (Мадярщина – Буковина) и Кōрōльово – Сатмар (на Румунію и Сербію). Забігаючи наперед, уповім, ож у часы Студеної войны НАТО плановало атаковати на Пудкарпатю атомными ударами три цілі: Чоп, Мукачево, Кōрōльово, бо так паралізовалися желїзничні комунікації СРСР из Центральнов Європов. Королівчани на тот момент мали ся прятати у винных подвалах пуд Замковов горов. Стали бы там ушиткі. До слова, за Масарика чехы зробили капітальноє бомбоукрытя за штреками коло стадіона, типирь затопленоє грунтовими водами.

У 1885 годі приватна будапештська компанія норвежця Грегерсена построила паралельно желїзничному Тековському ще й транспортно-пішоходный муст из двобочными крытыми галереями для челяди. Приватні компанії активно споруджовали пуд’їздні путі, вокзалы, склады и тому подобноє. Ото мусіло робитися по єдиному державному стандарту. Доныні функціонуют вокзалы, покладені за тыми проектами - у нашуй області ото суть Хуст, Берегово, Виноградово и т.д.

Автору прийшлося видіти такі самі вокзалы на провінційных штаціях Чехії, Мадярщины, Словаччины, Романії (Трансільванії), Сербії (Воєводины). Уд Тернополя и до Любляны вшиткоє желїзничноє газдувство было цілком подобным.

Паровозы на австро-мадярськых лініях до 1872 года мали персональні імена, як кораблі, лиш из увеличеньом їх числа перейшли на нумерацію. Цілком годно быти, ож першыми локомотивами у Королеві были паровозы серії МÁV –ІІ, котрых якмай для Сіверно-Віходної желїзниці спродуковав венський завод Wiener Neustädter Lokomotivfabrik.

Потому масовый выпуск локомотиву зачав новий будапештський завод Magyar Királyi Államvasutak Gépgyára – МÁVÁG, який у 1872-1874 годах направив у наш регіон 60 майсильных локомотиву серії МÁV –ІІІ. Они, скапчані попарно, уже бировали тягнути составы через карпатські перевалы.

Мадярські дизельпоїзды сього завода и типирь курсуют на лінії Батєво-Солотвино з королевського депо вже майже 5о годув!

Ані дві світові войны, ані пять перемін державности не могли остановити нашу желїзницю, но коронавірус лиш її спер.

желїзничний рух наростав з каждым годом, што не чудно, бо деревину, суль та другі товары з Марамороша вже мож было перевозити не гужовым транспортом, або Тисов, а желїзницьов. Зафіксовано, што у 1894 г. на штації Кōрōльово каждоденно курсовало 60 поїздув, з яких 18 пригородных, 4 пасажирськых скорых (чехи пак казали – ріхликы), 6 грузовых, газдусько-грузовых, мотрисы (мотор-вагоны). Екзистовали такі категорії пасажирськых поїздув: Györs – скорий експрес, без зупинок, Sebes – скорий із даякыми зупинками, Szemelyi – простий, из зупинками, як казали, коло каждого стовпа.

Далші статї из катеґōрії Істōрія читайте за удкликованьом
Реклама