rueпортал словник ґазета ґраматика

«Дарабчикы душі» Мигаля Чикивдї – інтервю за нову зберьку

«Дарабчикы душі» Мигаля Чикивдї – інтервю за нову зберьку

Ни так давно, 11. октовбра, увидїла світ нова, уже 9., книга молодого поета-публіціста из пудкарпатськых Березникув Магаля Чикивдї. «Дарабчикы душі» – зберька поезії вшелиякої тематікы. Позвідали-сьме ся го мало за книгу тай за самый процес творбы, и дале годни-сьте прочитати, што из того уйшло.

– Розкажи дашто за нову книгу, за обсяг юй, за темы.

– У книжцї «Дарабчикы душі», зобранї, мож повісти, вшыткі мої стихы за послїднї три рокы. Лиш типирь ми ся вдало пустити ї в світ. Тематика стихув усяка: патріотичнї, інтимнї, фіґлярнї, філософські, соціалнї… Вшытко їх до 130, што є дїля мене доста читаво.

– Де и якым накладом ся тіскла зберька?

– Исе выйшли перві екземпляры зборника. Пак, за выборами, буде напичатано 300 штук. Печатавут ми уже давно у Тячові. Кроме сьой’ книжкы, сього року, там ми напечатали «Акро по-нашому» и «Пудузятникы и промисел Довжанського округу»

– Тко ти помагав из реалізаційов?

– Сього року ставут ся всякі пудлі трафункы, ни задарь высокосный. Айбо як бы ни было, у 2020. роцї выдав им аж три книгы. Фінансову ня пудпорили Маріана Ланьо, дякувучи котруй я уже видав свої історичнї книгы «Березникы у давнину…» и «Історія віры Березникув» тай Йосиф Гучко, котрый быв помуг выдати «Русинську сатиру». Чесно, кидь бы ни они, та сам бы-м нич ни вчинив.

– Нипозеравучи на молодый вік уже-сь устиг выдати повно робут, розкажи за сам процес – як тото, написати и выдати книгу? Што дїля того треба вчинити?

– Книжку ни тяжко написати, кидь ты сим жыєш, кидь ты исе любиш робити. Бо коли пишу, та ото про мене удпочинок дїля душі. Та так помалы збираву матеріал до вороха. Стихы у єдну папку, історію у другу, етноґрафію у тритю… А пак коли ся читаво назберат, та уже роблю над готовым матеріалом, дорабляву и заганяву у выдавництво. Но айбо спиршу треба ищи глядати фінансову пудпору, бо, ги уже-м писав, сам ни вчиню нич.

А што ся тыче тематикы робут, повім сяк: Я ни читаво ламлю голову, ож про што бы написати. Ідея сама прийде у голову. А я пак лиш перезираву свуй матеріал, та пак вижу уже, кидь треба та доповнюву, дороблюву.

– Ци стрїчав ись ся даколи из даякыми проблемами выробы, позад тематікы книг? Як реаґувуть у выдавательствах, кой ся дузнавуть, ож книга по-русинськы?

– Ипен проблем у ня ни было шуга. Єдно хыба, ож, кой паровала ся до пичатаня книжка «Русинська сатира», та из видавництва ми казали, ож удповідалность буде за мнов. Ни задарь так ми казали, бо у стихах, де нарушуву острі соціалнї темы, хосновав им и паскуднї слова.

Красно дякуєме Мигальови за найденый час, бы удповісти нам на наші звіданкы. Желаєме му фурташного одуховеня и вшыткого доброго до будучности, бы и дале радовав нас свойов літерарнов творбов.

Кидь маєте дяку почитати щи даякоє інтервю, попозерайте испиc за одкликованьом: Інтервю

Далші статї из катеґорії Інтервю читайте за удкликованьом
Реклама